Հին Հունաստանում կոտորնոս կոչվող բարձրակրունկ կոշիկները հագնում էին դերասանները, որպեսզի բեմում ավելի տեսանելի լինեին։ Ենթադրաբար այս լուծումը մ․թ․ա․ 450 թվականին առաջարկել է դրամատուրգ Էսքիլեսը։

Ճապոնական Գետա փայտե կրունկով կոշիկներ տասնյակ տեսակներ կան, որոնցից ամենահները թվագրվում են 9-10-րդ դարերով։ Դրանք և տղամարդկանց համար են և կանանց։ Գետա կոշիկի տեսակներից մեկը հագնում էին գեյշաները, մեկ այլ տարբերակ հոգևորականները, ինչպես նաև բրնձի դաշտում աշխատողները։ Հատկանշական է, որ ճապոնացիներն առ այսօր գետան հագնում են` պահպանելով ավանդույթները։ 

16-րդ դարում Վենետիկում խիստ տարածված էին չոպինները․ կանայք, մասնավորապես՝ կուրտիզանուհիները հագնում էին մինչև 50սմ բարձրության կրունկներ, որպեսզի գրավեին տղամարդկանց ուշադրությունը։ Նման բարձրության կոշիկների վրա հնարավոր չէր քայլել, այդ պատճառով կնոջ կողքին մշտապես մի քանի սպասուհի կար` նրան օգնելու համար։

1533 թվականին Եկատերինա Մեդիչին ամուսնացավ Ֆրանսիայի ապագա թագավոր Հենրի II-ի հետ։ Եկատերինան 14 տարեկան էր, շատ նիհարիկ և ցածրահասակ։ Ֆլորենտինական կոշկագործները նրա համար պատրաստել էին բարձրակրունկ կոշիկներ, որոնք նա հագել էր հարսանիքի ժամանակ՝ խնամքով թաքցնելով դրանք զգեստի տակ։

17-րդ դարում կոշիկի այս տեսակը Ֆրանսիայի թագավոր՝ «Արև-արքա» Լյուդովիկոս XIV-ի ուշադրությունն է գրավում: Կարծիք կա, թե Լյուդովիկոսը շատ կարճահասակ էր, դրա համար էլ կրունկ էր հագնում, սակայն, ամենայն հավանականությամբ, արքային ուղղակի դուր էր գալիս իր վեհ քայլվածքը նման կոշիկներով։ Ավելին, իր կոշիկների կրունկները կարմիր էին ներկված, որ բոլորին նկատելի լինեին (Քրիստիան Լոբուտենից դարեր առա՜ջ): Թագավորն անգամ հրաման էր տվել, որ իրենից բացի ոչ մեկ իրավունք չունի ավելի բարձր կրունկներով կոշիկ հագնել:17-րդ դարում պարսիկ զինվորները կրունկով կոշիկներ հագնում էին ձիու թամբին ավելի ձիգ նստելու համար, և համարվում է, որ վերջիններս շնորհիվ էլ այս տեսակ կոշիկները տարածվեցին եվրոպացի զինվորների մոտ:

Եթե Լյուդովիկոս XIV-ի ժամանակ թագավորից բացի ուրիշ ոչ մեկ Վերսալում իրավունք չուներ կրունկով կոշիկներ հագնել, ապա 18-րդ դարում՝ նրա ծոռի` Լյուդովիկոս XV-ի թագավորության օրոք պալատական շատ կանայք սկսեցին կրունկով կոշիկներ հագնել: Ըստ էության, այս թրենդը (թեև այդ բառն այն ժամանակ դեռ չկար) սկսեց արքայի սիրուհին: Մարքիզուհի դը Պոմպոդուրի ցանկացած հագուստ, սանրվածք ակնթարթորեն կրկնօրինակվում էր Վերսալում: Մարքիզուհին փոքրամարմին էր, և իրեն ավելի տեսանելի դարձնելու համար սկսեց կրունկով կոշիկներ հագնել: Կարիք չկա շեշտելու, որ այն անմիջապես տարածում գտավ կանանց մոտ ամբողջ Եվրոպայով մեկ: Տարբեր երկրներում անգամ սկսեցին հատուկ օրենքներ սահմանել, որպեսզի միայն վերնախավի ներկայացուցիչները հագնեն նման կոշիկներ:

Ֆրանսիայում նորաձևությունը հաճախ էր փոփոխվում, և իհարկե նորաձևության վրա մեծ ազդեցություն ունի քաղաքական իրադարձությունները: Միջամտեց 1789-99թթ․ Ֆրանսիական հեղափոխությունը, որից հետո եկավ նապոլեոնյան ժամանակաշրջանի ամպիրը, երբ կանայք հագնում էին փափուկ թավշյա կոշիկներ՝ առանց որևէ ավելորդության և երկար տարիներ, անգամ` դարեր, բարձրակրունկ կոշիկները հագնում էին մեծամասամբ հասարակաց տներում:

Կրունկի վերածնունդը տեղի ունեցավ արդեն 20-րդ դարում, երբ նորաձևությունը կայծակնային արագությամբ զարգանում և փոփոխվում էր: 1920-ականներին զգեստների փեշը ավելի կարճ դարձավ, և կոշիկներն ավելի կարևոր տեղ զբաղեցրեցին պահարանում․ կրունկով կոշիկներն այլևս վուլգար չէր համարվում:

Եվս մեկ հեղափոխություն տեղի ունեցավ արդեն 1950-ականներին, երբ հոլիվուդյան գլխավոր «կոշկակար» Սալվատորե Ֆերագամոն հայտնագործեց հարմար տակացուով բարձր կրունկը: Դրան զուգահեռ Ֆրանսիսյում նույն ժամանակ Ռոժե Վիվիենը Քրիստիան Դիորի համար առաջարկեց իր հայտնագործած բարձրկրունկը, դառնալով միակ կոշկագործը, որին Դիորը թույլ տվեց պահպանել կոշիկների վրա իր անունը:

1998-ից 2004 թվականը հեռարձակվող «Սեքսը և քաղաքը» հեռուստասերիալի Սառա Ջեսսիկա Պարկերի հերոսուհու կրքերից մեկը կոշիկներն էին, գրեթե բոլոր էպիզոդներում խոսում էին կոշիկների մասին, Քերրին կոշիկների ահռելի հավաքածու ուներ, և իզուր չէր, որ նրա երազանքի Միստր Բիգը նրան ամուսնության առաջարկություն արեց դատարկ զգեստապահարանում Manolo Blahnik բրենդի կոշիկներով:

Չնայած այն փաստին, որ Քրիստիան Լոբուտենի կոշիկները հայտնի էին դեռ 1980-ականներից, նրանք համաշխարհային փառքի հասան 1990-ականների վերջից մինչև 2010-ականները: Նրա բրենդի կոշիկները սպառվում էին շատ արագ, այս կոշիկներին երգեր էին ձոնվում, նրանց կրկնօրինակում էին, և անգամ աղջիկները կարմիր լաքով ներկում էին տակացուն, որպեսզի կոշիկը նմանվի հայտնի բրենդին:

2020-ի քովիդային համավարակը փորձեց վերջ դնել կրունկների հաղթարշավին: Տանը փակված կանայք նախընտրում էին հարմարավետ հողաթափերը: Թվում էր, թե այս իրավիճակը ձգվելու է շատ երկար: Շատ ամսագրեր կանխատեսում էին կանացի պահարանի վերաիմաստավորում: Բայց մարդկությունն իրականում «անուղղելի է»: Մեր կյանքի այս կարճ ժամանակաշրջանը թույլ տվեց հասկանալ, որ կյանքն իրականում շատ կարճ է, պետք է հասցնել վայելել և տոն դարձնել ամեն օրը: Այդպես, 2021-ին խանութներ վերադարձան նախ վառ հագուստները, այնուհետև` բարձրակրունկ և տոնական կոշիկները, զարդարված փետուրներով, քարերով, բանտերով: Իզուր չէ, որ 2024 թվականի թրենդային կոշիկներից մեկը դասական սրածայր բարձրակրունկն է, և կարծես, թե բարձրակրունկ կոշիկներն այդպես էլ երբեք չեն լքելու կնոջ պահարանը: Վերսաչեի Medusa Aevitas վարդագույն մետաքսյա կոշիկները հայտնվեցին 2021 թվականին և անմիջապես դարձան թրենդային:

Ստեղծվելով, մեծամասամբ որպես տղամարդկանց պահարանի մաս, կրունկով կոշիկները դարերի ընթացքում սահուն անցան կանացի պահարան, սակայն տղամարդիկ առ այսօր չեն հանձնվում և փորձում են կրունկը վերադարձել։ Ավելի շատ համարձակ են գտնվում արվեստի բնագավառի մարդիկ։ Հայտնի դերասան Ջարեդ Լետոն և Հարի Ստայլզը, Գուչիի հետ համագործակցելով, հաճախ իրենց հագուսների հետ հագնում են բարձրակրունկ կոշիկներ։ Ուկրաինական հայտնի Kozaky պարի խումբը ապացուցեց, որ տղամարդիկ ոչ միայն կարող են բարձրակրունկների վրա քայլել, այլև պարել։

Քաղաքական գործիչներն ևս օգտագործում են կրունկի ուժը` մի քանի սանտիմետր բարձրահասակ երևալու համար։ Այդ առումով տարբերվում է Ռուսաստանի նախագահ Վլադիմիր Պուտինը, որին լրագրողները կասկածում էին կրկնակի կրունկ օգտագործելու մեջ, որպեսզի ավելի բարձրահասակ երևա, իսկ Չեչնիայի առաջնորդ Կադիրովն անթաքույց հագնում է Պրադա բրենդի բանակային ոճի կրունկով կոշիկները։ Այդ կոշիկներն ունիսեքսն են և արժեն ավելին, քան 1000€։